مفكّر لبناني: انا رح دليكم وين الحزب فاسد وشو بدو يصير يصير
مفكّر لبناني: انا رح دليكم وين الحزب فاسد وشو بدو يصير يصير

بقلم ناجي امهز

هيدي قصة الحزب تبع الله مش راكبة بعقول الناس تبع الحئيئة والفينيقيين، وكمان في مشايخ محسوبين على الطائفة الشيعية، مش عم يركب معهم.
يا خيي ليش مش عم يركب معك الحزب، بقلك يا صديقي هيدا حزب ايراني، 
س: اووف وشو عرفك انه ايراني
ج: يا خي السيد بضل يقول مصرياته واكلاته وشرباته ولباساته من ايران، 

س: طيب انت شو زاعجك اذا معك تطعميه وتشربه وتجبله تياب، انا بحكيلك معه للسيد يبطل ياخد شي من ايران.
ج: لك يا خيي هو ليش انا ملاقي اكل واشرب بدي طعمي الحزب.

س: طيب لا معك تاكل ولا قادر تطعمي وما بتزيح من قدام يلي عم بطعمي، طيب شو بدك.
ج: يا صديقي ما بدي شي بس انه السلاح والصواريخ وهيدي الحروب من اليمن لسوريا للعراق...

س: ايه كمل لبحر البلطيق ولجبال الالب، وماتنسى افغانستان وباكستان، والشيشان، والبحرين والسعودية والكويت واوروبا وامريكا اللاتنية فنزويلا وكوبا، انت قصدك تقول انه الحزب موجود بكل دول العالم.
ج: انه ايه الحزب وين ما كان عم يعمل حروب، ونحنا بطل فينا نتحمل.

س: طيب يا صديقي انت مقتنع انه الحزب موجود بكل هيدي الدول،
ج: هو للحئيئة يعني مبينة انها كذبة كبيرة، لان اصلا عدد الشيعة بلبنان لو بتوزعهم على الدول يلي عم بقولوا عم يدخل فيها الحزب يعني المفروض ما يبقى شيعة بلبنان.

س: طيب مدامك عارف انه كذبة ليش ماشي فيها.
ج: بدك للحئيئة انا بحكي على الحزب هيك تيبطل ايراني، ويرجع للبنانيته.

س: ليش حضرتك لبناني،
ج: ايه بالتاكيد لبناني وبدي الحرية والسيادة والاستقلال.

س: بتعرف شغلة قنعتني بلبنانيتك، انا عندي خطة لرجع الحزب للبنانيته، شو رايك نطالب الدولة اللبنانية تمنع تدريس اللغة الفارسية المفروضة على الطلاب متل اللغة الفرنسية او الانجليزية،
ج: ليش بلبنان بدرسوا اللغة الفارسية

س: لاء بس لازم الحزب يطالب تدريسها الزاميا متل ما حضرتك طالبت بالزام اللغة الفرنسية والانجليزية بالبرنامج التعليمي، كمان لازم الحزب يطالب بيوم لبراني متل ما حضرتك عندك يوم فرنكفوني.
ج: بس هيك بصير لبنان ايراني رسميا،

س: ما هو لازم يصير لبنان ايراني رسميا، متل منه رسميا فرنكفوني.
ج: وكيف هيك بتكون عم ترد الحزب للبنانيته

س: لان ساعتها انت بتلغي الفرنكفونية تبعتك، وهو بيلغي الايرانية تبعتو.
ج: شو عم تمزح معي

س: لا انت عم تمزح معي
ج: بدك الحئيئة 

س: ايه بدي الحئيئة
ج: انا ما بحب الحزب لانه فاسد

س: وين الحزب فاسد
ج: رح دليك بتذكر من زمان لما الحزب اخد وزارة الطاقة على ايام فنيش.

س: ايه بذكرولقاها متل مغارة علي بابا وال 5000 حرامي، ولما شاف انه ملف الكهربا كارثة، قال لنجيب الكهربا من ايران ببلاش، قاموا عليه تبع السيادة والاستقلال وقالوا ما بدهم كهربا من ايران لان بتضوي اصفر.
ج: طيب غير الكهربا انا رح اثبتلك انه الحزب فاسد، مش هو يلي حامي السياسيين، والدليل انه ما بيوقف بوجهن

س: طيب ما ماكرون اعترف انه هودي السياسيين انتخبهم الشعب اللبناني وما في يتجاوزهم، ليش بتقبلها على ماكرون وما بتقبلها للحزب، ولا لان ماكرون فرنكفوني.
ج: طيب هلق هلق مش عم بقولوا انه الحزب عم يسرق الاكل المدعوم ويخزنه.

س: اي اكل مدعوم هودي مواد غذائية من ايران وكلها ماركات ايرانية، واذا منك مصدق نزال على التعاونية على طريق المطار واشتري بربع السعر يلي بدك ياه.
ج: عم تحكي عنجد بربع السعر.

س: ايه بربع السعر 
ج: اذا هيك خوش امديد بكل البضائع الايرانية

س: لوينك رايح ما بدك تدليني وين الحزب فاسد، يا صديقي تعى لنبرم بركي منلاقي شي تهمة نلبسها للحزب.
شو رايك نقول انه الحزب هو المسؤول عن الهندسات المالية، لانه حاكم البنك المركزي، بس ما بتزبط لان ما بحق للطائفة الشيعية.
شو رايك نقول الحزب هو سرق اموال المودعين بس ما عنده ولا بنك، كمان ما بتزبط.
وين راح تبع الحئيئة والفينيقيين، يا ويلي هلق بيشتري كل التعاونية للحق حالي بكم كيلو رز وسكر وشوية زيت...

أقلام حرة

المصدر: ناجي أمهز

الأربعاء 07 نيسان , 2021 01:45
التعريفات :
تابعنا على
أخبار ذات صلة
الأحدث
شاشة الواقع السعودي
من نحن
.
نبذة عن الموقع
.
إتصل بنا
.
شروط الاستخدام
© 2021 - الواقع السعودي. جميع الحقوق محفوظة.
تابعنا على مواقع التواصل الإجتماعي